Sayğılı vatandaslarımız, soydaşlarımız!

İşte ömrümüzün daha bir yılı geçip gitti. 2 bin kadar soydaşımız için bu yıl sonki yıl oldu. Oların ruhları şad olsun, Allah olara rahmet eylesin. Ama ayni bu yıl ikki buçuk bin kadar yeni evladlarımız dünyağa keldi, daha bin kişi kadar soydaşlarımız sürgünlükten vatanlarına kaytıp keldiler.
Yani hayat devam ete ve yavaş yavaş olsa da, vatanimizda
insanlarimizin sayisi artmaktadir.
Vatanlarına kaytıp kelgen soydaşlarımızın sosyal meseleleri çözümü, daha ğurbet topraklarında kalğan soydaşlarımızın vatanlarına kaytıp kelmesi ve umumen milletimizin hep hak-hukukları iade edilmesi için bu yılda da halkımız tarafından epeyce ğayretler sarfedilidi. Elbet, hep isteklerimizge ulaşıp olamadık, ama her halde, milletimiz öz
toprağına sahip olması için daha birkaç adımlar atıldı.
Devlet ve cumhuriyetin butcetlerinden ayrılğan 75 milyonğa yakın paralarğa birkaç evler kuruldu ve satın alındı, su, elektrik, yol ve gaz hatları geçirildi, bazı medeni ve maarif meselelerimiz çözüldü. Yaptığımız araştırmalarğa köre, keçken yıl Kırımtatar ailelerin dörtte birin hayat seviyeleri biraz kolaylaştı, ama bazı sebeplerden dolayı vaziyetleri daha zorlaşkan ailelerin de sayısı epeyce büyük.
Keçken yıl içerisinde yeni seçilgen cumhurbaşkanı V.Yuşçenko’nen, başbakanı Yehanurov’nen, çeşit bakanlarnen ve diğer yüksek seviyedeki devlet adamlarınen birkaç körüşmelerimiz olup geçti ve problemlerimizin çözüm yolları müzakere etildi.
Yeni Cumhurbaşkanı seçimlerrin neticesi olarak ikki kere Kırım otonom cumhuriyetin hukümeti denişti. Yeni hukümette istediğimiz kadar olmasa da, ama biraz halkımızın temsilcilerin sayısı arttırıldı ve bazı meselelerimizin çözüm yolları kolaylaştırıldı.
Aslında, bizim meselelerimizin çözülmesini zorlaştırğan, mahkemelerde vatandaşlarımızğa karşı adaletsiz kararlar alınğanın en esas sebeplerinden birisi şu ki, cumhuriyetin devlet idarelerinde, organlarında, mahkemelerinde ve çeşit diger strukturlarında çalışanların ve başkanlık yapan kimselerin büyük çoğunluğun bizim halkımıza karşı düşmanca davranışları ve bu idarelerde halkımızın
temsilcileri son derece az olmasıdır. Onun için nasıldır bir vatandaşlarımızğa karşı haksızlık yapıldığı zaman hepimiz ayaklanmamız kerek.
İkkinciden, devlet strukturlarında halkımızın temsilcileri çoğalması için her taraflı tedbirler alınması kerektir. Bunun için, birinciden, hep seçimlerde aktiv iştirak etmemiz ve akıllı davranmamız kerektir. Böyle fırsat, bildiğiniz kibi, birkaç aydan – 26 Martta olacaktır. Bu sefer yeni seçim kanununa köre, parlamento ve rayon şuralarına seçimlerde yalnız partiler iştirak etecek. 20 kün evvel olup keçken
Kurultayımızda biz bu seçimlerde çok yıllar devamında bizlernen işbirlik yapkan ve hep taleplerimizge destekçi ve yardımcı olğan RUH partisinen beraber iştirak etmeğe karar alındı. Eğer bu seçimlerde biz aktiv davransak ve hep seslerimizni Kurultay, Milli Meclis ve yerli meclislerrimiz tarafından kösterilgen namzetlerge versek, çeşit satkın avantüristlerin propagandasına veya olar tarafından bu künlerde mutlaka dağıtılacak sahte yardımlarğa kapılmayıp seslerimizin bölünmesine fırsat vermesek, eminim ki, biz kelecek 5 yıl içerisinde meselelerimiz biraz kolayca çüzülmesine yollar açacakmız ve daha bir kere etraftakilerine Kırım Tatar halkının birliğini ve ne derecede siyasi kuvvet olduğunu kösterecekmiz. Ve inşallah öyle de olacaktır.
Sayğılı vatandaşlarımız, Yanı yılınız hayırlı olsun, evlerinizde daima bereket, muabettlik ve vatanperverlik havası olsun.
Birkaç künden mukaddes İslam dinimizin büyük bayramı – Qurban bayramı da başlanacak. Fırsatnen faydalanıp, bu bayramımıznen de sizlerni samimiyetle tebriklemek isteyim.
Kesecek kurbanlarınıznı Allah kabul eylesin ve hep işlerinizde yardımcı olsun.
31 Dekabr 2005 s.